Album

Album ELIMBERRI Pantxix & Primaël, 2026 (autoeditat)

https://elimberri.bandcamp.com/album/elimberri

GASC. Lo duet Elimberri de Pantxix Bidart e Primaël Montgauzi qu’es l’encontre de duas culturas e duas lengas sòrs, la basca e la gascona. Los dus artistas que las hèn dialogar, cantar, s’armonizar de manèra actuau, en tot hèr chorrar la saviessa deus aujòls deguens lo noste mond contemporanèu. Mos sentèm hòra deu temps, coma ua velhada pròp deu huec, mudats per la musica, los condes e las legendas, per la doçor deus cants e la poesia deus mòts.

EUS. Pantxix Bidart eta Primaël Montgauzik sortu Elimberri ikusgarria bi kultura ahaideen arteko topaketa da. Bi artistek mintzarazten dituzte, kantarazten, gaurko harmonian, heien aspaldiko zuhurtzia gure mundu garaikidean erakutsi nahian. Denboratik kanpo gabiltza, supazter xokoan bezala, musikak, ipuinek, mitoetan murgildurik, hitzen eta kanten goxotasunean.

FR. Le duo Elimberri de Pantxix Bidart et Primaël Montgauzi c’est la rencontre de deux cultures et deux langues sœurs, la basque et l’occitane dans son dialecte gascon. Les deux artistes les font dialoguer, chanter, s’harmoniser de manière actuelle, faisant rejaillir leur sagesse ancestrale dans notre monde contemporain. On se sent hors du temps, comme une veillée près du feu, transporté par la musique, les contes et les légendes, par la douceur des chants et la poésie des mots.

Credits :

• Mix e mastering : Luis Mazzoni, Vintage Sound Studio
• Grafisme : Bastiaan Ruys
• Fotografia : Antton Bidart Hirigoyen

Sostengut per l’Euskal Kultur Erakundea, Voix du Sud e l’Observatòri de las Culturas Gasconas

Album Languiment, 2022 (autoeditat)

Lo languiment, a l’encòp nostalgia e tristessa de sentí’s lonh deu país o de quauqu’un, mès tanben espèra deu retorn de quauqu’un o de quaucom com òm se langueish de l’arribada d’un amic, sòrta de saudade occitana, o « nostalgia deu futur ». Dens aqueste navèth àlbum qu’èi essajat de transpausar musicaument e poeticament aqueste sentiment tan prigond, pramor que’m sembla conténguer l’emocion contemporanèa deu mond, com presa dens un entrelutz.

A travèrs la mea òbra, que cèrqui a revelar los sentits mes personaus e universaus a l’encòp, díser deu mond los flus qui mos travèrsan, entre marmús e crit, entre desesperança e volontat de luta, entre dolor e doçor.

I retrobaratz quauques cançons meas dejà un pauc conegudas (Libertat, Cant de rua), ua majoritat de navetats en gascon, un duo damb la cantaira franco-malgasha Fifaliana Defontaines (Un jardin), la cançon en catalan Caminant qui ganhèc lo prèmi de la melhora cançon en catalan au festival Música i Lletra de Xàtiva 2021 (País Valencian), ua cançon en espanhòl entà hèr aunor a las meas influéncias latino-americanas e una cançon en francés en per evocacion poetica deu Canal de Brienne a Tolosa.

I escotaratz d’instruments variats com la guitarra classica, la guitarra portuguesa, l’od, la darbokè, lo cajon, e lo daf, tots jogats peu multi-instrumentista franco-tunisian Chokri Trabelsi, e lo violoncèle dens las mans de la musiciana parisiano-roergata Mathilde Comoy-Robert. La guitarra classica, lo piano e l’acordeon cromatic que m’acompanhan tanben.

Totas las dètz cançons que son heituras meas, e m’inspiri tostems d’aquò qui’m pertòca musicaument : lo fado, la cançon orientala, la morna capverdiana, la bossa, la trova latina e lo folksong.

Los enregistraments e lo mastering que’us hasoc lo Luis Mazzoni au Vintage Sound Studio de la Ciutat de la musica deu Garric en Tarn. Qu’es un engenhaire deu son hòrt reconegut en la region e que trabalhèc dejà damb Eric Fraj, Guillaume Lopez o Lolita Demonteil Ayral entre autes.

Lo grafisme de l’àlbum estoc hèit per l’illustrator gascon Ugo Bagnarosa, amic d’enfància qui’m segueish e m’acompanha dens los mens projèctes dempuish la debuta.

* Entà descobrir las paraulas de las cançons de l’àlbum : https://trobasons.viasona.cat/a/1533