Album

Album Languiment, 2022 (autoeditat)

Lo languiment, a l’encòp nostalgia e tristessa de sentí’s lonh deu país o de quauqu’un, mès tanben espèra deu retorn de quauqu’un o de quaucom com òm se langueish de l’arribada d’un amic, sòrta de saudade occitana, o « nostalgia deu futur ». Dens aqueste navèth àlbum qu’èi essajat de transpausar musicaument e poeticament aqueste sentiment tan prigond, pramor que’m sembla conténguer l’emocion contemporanèa deu mond, com presa dens un entrelutz.

A travèrs la mea òbra, que cèrqui a revelar los sentits mes personaus e universaus a l’encòp, díser deu mond los flus qui mos travèrsan, entre marmús e crit, entre desesperança e volontat de luta, entre dolor e doçor.

I retrobaratz quauques cançons meas dejà un pauc conegudas (Libertat, Cant de rua), ua majoritat de navetats en gascon, un duo damb la cantaira franco-malgasha Fifaliana Defontaines (Un jardin), la cançon en catalan Caminant qui ganhèc lo prèmi de la melhora cançon en catalan au festival Música i Lletra de Xàtiva 2021 (País Valencian), ua cançon en espanhòl entà hèr aunor a las meas influéncias latino-americanas e una cançon en francés en per evocacion poetica deu Canal de Brienne a Tolosa.

I escotaratz d’instruments variats com la guitarra classica, la guitarra portuguesa, l’od, la darbokè, lo cajon, e lo daf, tots jogats peu multi-instrumentista franco-tunisian Chokri Trabelsi, e lo violoncèle dens las mans de la musiciana parisiano-roergata Mathilde Comoy-Robert. La guitarra classica, lo piano e l’acordeon cromatic que m’acompanhan tanben.

Totas las dètz cançons que son heituras meas, e m’inspiri tostems d’aquò qui’m pertòca musicaument : lo fado, la cançon orientala, la morna capverdiana, la bossa, la trova latina e lo folksong.

Los enregistraments e lo mastering que’us hasoc lo Luis Mazzoni au Vintage Sound Studio de la Ciutat de la musica deu Garric en Tarn. Qu’es un engenhaire deu son hòrt reconegut en la region e que trabalhèc dejà damb Eric Fraj, Guillaume Lopez o Lolita Demonteil Ayral entre autes.

Lo grafisme de l’àlbum estoc hèit per l’illustrator gascon Ugo Bagnarosa, amic d’enfància qui’m segueish e m’acompanha dens los mens projèctes dempuish la debuta.

* Entà descobrir las paraulas de las cançons de l’àlbum : https://trobasons.viasona.cat/a/1533